30n collòqui de la FLAREP: Identitat e alteritat. Las lengas regionalas dins l’ensenhament public

La FELCO, los legeires de Jornalet o sabon probable, es federada dins la FLAREP, que recampa las associacions de parents e d’ensenhaires de l’ensenhament public de las diversas lengas regionalas.

La FLAREP foguèt creada 20 ans fa, al moment qu’espelissián las primièras escòlas publicas bilinguas e la FELCO foguèt una de las associacions fondatrises.
 
Èra essencial, e o es totjon, per nosautres de trabalhar en collaboracion amb los militants de las autras lengas de França que se baton per que l’escòla publica, aquí ont son escolarizats l’immensa majoritat dels dròlles, faga a nòstras lengas una plaça digna. Se batre per que l’escòla publica ofrisca als enfants totes un ensenhament de lenga regionala: non pas esperar una demanda sociala que pòt venir sonque de familhas ja conscientizadas mas ofrir a totes aqueles que pòdon pas demandar una causa que sabon pas.
 
Dins las principalas activitats de la FLAREP, i a l’organizacion d’un collòqui annadièr, que vira cada annada d’una region a l’autra, pres en carga, cada còp, per l’associacion representatritz. Aquel collòqui es escasença de rescontres e d’escambis entre parents e ensenhaires. Permet la presentacion d’experiéncias pedagogicas e tanben la descubèrta de creacions culturalas originalas. Es tanben escasença de debats, taulas redondas ont son convidats elegits, representants sindicals, representants de l’Educacion Nacionala e de las federacions de parents d’escolans.
 
Lo darrièr còp que s’organizèt lo collòqui en país occitan, èra a Sant-Africa, en Avairon, en 2008, lo quatren còp après Albi (1989), Montpelhièr (1994), e Villanòva d’Òlt (2000).
 
En 2016, lo collòqui torna en cò nòstre, organizat principalament per lo CREO Lengadòc, amb lo concors de las autras associacions academicas e aquel de l’associacion de parents d’escolans bilingues OCBI.
 
Mercés al concors de la Region, del Conselh despartamental, de la Metropòli e de la vila de Montpelhièr, poirem perpausar als participants de condicions materialas e un programa de qualitat. Avèm dubèrt un sit internet http://www.flarep2016.com/ ont se tròba aquel programa e mai totas las informacions materialas e lo butletin d’inscripcion.
 
L’eveniment se debanarà a Montpelhièr pròche de la Gara (Gazette Cafè) e de de la Comèdia (Sala Molière, darrièr lo teatre). Lo tresen jorn serà consacrat a la visita del CIRDOC e a una escorreguda a Seta.
 
 
Identitat e alteritat. Perqué aquel tèma?
 
Al moment que, d’en pertot dins lo mond, de concepcions identitàrias barradas semondon la paur e la mòrt, al moment que, en cò nòstre, s’afortisson las ideologias de l’exclusion, volèm mostrar que la reconeissença e la coneissença de las lengas regionalas pòdon e devon mostrar una dobertura d’esperit, una concepcion dobèrta de la ciutadenetat. Aqueste collòqui vòl pausar la question d’un punt de vista filosofic general, mas tanben l’abordar en partent de nòstras practicas d’ensenhament.
 
 
Un programa ric e variat
 
Dissabte 22 d’octòbre - dubertura oficiala – taulas-redondas – conferéncia inaugurala (Sala Molière)