La majoritat dels eurodeputats an votat en favor de retirar l’immunitat parlamentària de tres deputats catalans (404 contra 247). Los tres (Toní Comin, Carles Puigdemont e Clara Ponsatí) son acusats per l’Estat espanhòl d’aver participat de faiçon absoludament pacifica a l’organizacion d’un referèndum sus l’independéncia de Catalonha! Que sigó en 2017.
Tres eurodeputats que contèstan l’ordi actual dels Estats Nacions en Euròpa son donc condamnats e riscan d’èstre mandats entre las mans de jutges espanhòls.
Èran pas pro europeïstas? Non! N’èran tròp? Benlèu!
Explicatz-me, vosautres eurodeputats coma podètz justificar vòstra posicion? Sètz los aparaires de l’idèa europèa? Alara perqué vos metre al servici d’un Estat qu’a sabut sonque enviar la polícia per respondre a una volontat democratica?
Explicatz me perqué obritz la pòrta a la condamnacion de tres de vòstres collègas qu’an obrat en favor d’una consultacion democratica. La volontat d’inependéncia, qu’es l’afar dels catalans e sonque, ni la vòstra ni la meuna, foguèt confirmada dins las urnas fa tres setmanas. Ma preocupacion coma ciutadan europèu es la democracia e sonque. E la vòstra, coma eurodeputats, quala es?
E vos, acceptatz de liurar als jutges (disi pas a la Justícia) espanhòls aqueles tres eurodeputats? Mas quina Euròpa volètz? Me demandi se volètz una Euròpa?
Finalament es aquò la question? E la segonda question que ven es: es que volètz vertadièrament la democracia? Pr’amor aqueles tres deputats que condamnatz son estats elegits coma vosautres, amb la meteissa legitimitat.
Alavetz que volètz?
David Grosclaude
Partit Occitan Vice-president de l’ALE
david-grosclaude.com
Cal senhalar qu’èra un vòta dab bulletin secret. Lo Grop d’eurodeputats qui compta los de mon partit l’Aliança Libra Europèa amb los Verds (ALE –Verds) a fait saber que votava unanimament contra lo fait de retirar l’immunitat
